今日重心推介場次，係西甲早場華倫西亞主場迎戰基達菲，基達菲出晒名係作客蟲，「蝙蝠兵團」新帥加利尼維利急於喺聯賽開齋交代，今仗絕對係殺無赦，初盤讓到半一兼低水，睇得出莊家信心十足，呢個上盤有買趁早。

（now 632周六晚11時直播）

華倫上周作客伊巴竟開平手盤兼高水，邊有咁大隻蛤乸隨街跳呀，肥叔率先推介伊巴，臨尾被追和走盤堅唔抵。不過華倫今仗返主場對基達菲，就係另一回事，一來剛喺西盃出局嘅基達菲作客太曳，開咧8仗客場不勝兼輸咗7場，見到都唔開胃，二來係高調空降華倫嘅新帥加利尼維利，儘管啱啱喺西盃贏巴拉卡度打開勝門，但喺聯賽仲未開齋，備受質疑嘅加利佬急於贏波交代。肥叔翻查外國博彩公司，華倫主W賠率介乎1.66至1.67倍，惟獨足智彩開出1.53倍，熱到燙手，讓球盤更開出華倫讓半一，得番八三水咁低，睇嚟有啲計喎，況且近10交手華倫贏咗8次，擺明食住基達菲，入定上盤冇衰。

紐卡素反彈追殺維拉
至於英超尾場紐卡素主場對阿士東維拉，維拉連續15場聯賽未贏過，曳到冇朋友，相反「喜鵲」連贏利物浦同熱刺，從谷底反彈，加上近8次碰頭未輸過，初盤小讓平半，肥叔認為值得用半個盤博贏晒成個盤，一於撐紐卡素。

（now 621周日凌晨1時30分直播）