「花旗孖寶」為國效命
美洲國家盃後又輪到美洲金盃開戰，不過唔少美職隊伍都係受害者，當中西雅圖海灣者都幾大鑊，事關丹普西同巴特伊雲斯一對「花旗孖寶」都肯定缺陣，就算係主場出擊都唔慌有運行，華盛頓聯隊受讓平半，一於博2.14倍嘅下盤啦！（TVB301周六早上11:00直播）

西雅圖海灣者今夏勁濕滯，除咗靈魂人物丹普西、巴特伊雲斯要為國效命外，古巴嘅奧斯禾度阿朗素同危地馬拉指揮官馬高柏巴，都已經離隊備戰美洲金盃。

西雅圖防線失波多
仲有呀，養緊傷嘅尼日利亞射手馬田斯，最快都要到8月先至可以復操，至少有5件主力肯定唔踢得，個陣容天殘地缺，喺聯賽連輸3場之餘，後防仲要狂失7粒，睇怕今場想全取３分都幾難。

華盛頓聯隊

近3戰聯賽不敗
另邊廂嘅華盛頓聯隊啱啱喺美聯盃出局，教頭賓奧臣仲特登安排幾件主力休息，集中火力應付聯賽，而且呢班波最近3場美職都搶到分，射手路菲更加係入球停不了，今仗繼續數胡有乜出奇？睇番往績，華盛頓聯隊自2011年5月之後，都未試過喺美職擊敗海灣者，趁住海灣者家陣甩皮甩骨，仲唔係破宿命好時機？下盤好路呀！