比歷領軍頭炮出音波功
歐霸盃第一圈外圍賽率先開打，首回合焦點之戰，英超韋斯咸主場對安道爾球隊路施坦斯。「錘仔幫」早前聘請克羅地亞名帥比歷執教，呢位「音樂達人」性格豪邁，首場正式賽事領軍，當然要爭取大勝打響頭炮，勢必大炒「魚腩」路施坦斯，韋斯咸讓三球照捧讓球主勝。

（周五凌晨2時45分開賽）

上季英超僅排十二位嘅韋斯咸，以公平競技席位獲得歐霸盃資格，相隔九年重返歐洲賽。會方為「隆重其事」，炒咗已執教球隊四年嘅艾拿戴斯，搵來比歷領軍。呢位前克羅地亞國家隊領隊喺球員時代曾經効力韋斯咸、愛華頓，對英超球隊文化瞭如指掌，今次回巢「錘仔幫」，相信工作可以迅速上手。四十六歲嘅比歷擅長以音樂激勵軍心，首仗出擊應該會播放強勁音樂，狂炒對手壯聲威。

韋斯咸除咗換帥之外亦有增兵，當中以簽入馬賽翼鋒皮耶最有睇頭，呢位二十八歲法國國腳上季法甲攻入七球，初到貴境當然要交足功課，博取比歷及球迷歡心。雖然厄瓜多爾射手安拿華倫西亞踢完美洲盃仍未歸隊，但仲有迪亞法沙高、湯堅斯、祖爾奧拜恩等主力助陣，今仗仍然夠殺。

路施坦斯水平低過香港
安道爾國家隊世界排名二百零四位，比香港仲要低四十位，該國足球水平有幾多斤両可想而知。況且路施坦斯只係上季聯賽亞軍，更加難寄予厚望，佢哋唔好彩抽中對韋斯咸，只能抱學習心態比賽，今次自然要交足學費啦！