世冠4強戰 廣州難偷雞
世冠盃第2場4強戰，萬眾矚目嘅巴塞隆拿今日下晝會喺橫濱日產球場，迎戰亞洲代表廣州淘寶恒大（足智彩譯FC廣州）。雖然恒大主帥史高拉利賽前表明球隊目標係要殺入決賽爭冠軍，之不過雙方實力有明顯差距，加上巴塞力爭成為世冠盃史上首支3度封王嘅球隊，呢鋪仲點會放過恒大先，就算佢哋讓2球都照捧1.72倍讓主。（有線61、64、201及203、廣東體育及中央5台周四晚6:30直播）

恒大自從贏咗亞冠盃後，主帥史高拉利就將目光放喺世冠盃身上，揚言要同巴塞、河床等老牌勁旅一較高下。之不過佢哋上一圈就差啲失手，被CF阿美利加先開紀錄，好在憑住鄭龍同荷西保連奴嘅入波，先反勝對手2:1晉級。需知CF阿美利加火力已經唔算勁，喺今季墨超僅排第6，連佢哋都守唔住，呢次對住火力數一數二嘅巴塞仲點擋得住先？

恒大防線級數輸晒
雖然話恒大中前場有唔少森巴兵幫手，尤其中場荷西保連奴曾喺3年前，代表哥連泰斯1:0擊敗車路士奪冠。之不過球隊後防明顯遜色，包括南韓外援金英權，中國國腳張琳芃等4名正選，均未曾到歐洲落班，為國上陣次數加埋亦未有120次，經驗同實力有一定差距下，好難旨意佢哋守得住囉。

雖然巴塞今仗將會缺少射手尼馬，不過以美斯同蘇亞雷斯為首嘅鋒線，仍然夠卡士開火。事實上今次係「地上最強」第4次出戰世冠盃，王牌美斯就向FIFA官網透露，自己非常睇重，並期望第3次捧盃，鬥心唔使懷疑。

地上最強恰慣中國兵
況且巴塞過去幾年都有同中國球隊交手嘅經驗，4戰全勝兼且未失1球，連熱身賽都唔肯放水畀人入番粒，嚟到呢場正式比賽佢哋邊肯「零的突破」咁樣衰吖。再者，守將佐迪艾巴賽前表明，主帥安歷基已經警告一眾隊友唔好輕敵，只要巴塞踢出應有水準，想喺入決賽前大勝一場振軍心唔難囉。