今輪英超壓軸尾場，由異軍突起嘅「狐狸」李斯特城主場迎戰衞冕嘅車路士，「狐狸」嘅「MJ」前鋒組合占美華迪（Jamie Vardy）和馬列斯（Mahrez）火力全開，信心爆晒棚。相反車路士時好時壞，防線唔掂睇見都眼冤，加上李城主帥雲尼亞里同車仔領隊莫連奴牙齒印甚深，必定趁機打落水狗，仲有得受讓咁筍，讓球主勝咪錯過。

(now 621周二凌晨4時直播)

兩軍開季成績各走極端，未計尋晚賽果，李斯特城依家與曼城同得32分，因得失球較差屈居次席，但打少1場，當中最搶眼嘅梗係前鋒占美華迪，上仗雖然交白卷，連續11仗英超入波走勢告終，但仍交出靚助攻，好拍檔馬列斯大演帽子戲法作客大勝史雲斯3比0，呢對「MJ」前鋒今季合共攻入24球，令李斯特城以32球，成為目前英超入球最多嘅隊伍之一，輪流發威攻力非同小可。

車路士頹爆 咪抱幻想
另一邊廂，出閘脫腳嘅車路士則繼續頹爆，上輪聯賽主場0比1不敵般尼茅夫，近6仗聯賽輸4仗，堂堂上季盟主曳到跌落第15位，非常折墮，連「寸王」莫連奴上仗賽後亦表示改以爭入前6為目標，士氣低落。之前傳出同「寸王」不和嘅箭頭迪亞高哥斯達，今季嚴重跌Watt，齋計聯賽只入得3粒咁大把。同時，「寸王」一向引以自豪嘅後防，又錯漏百出，就算門神泰拔高圖爾斯傷愈復出都幫唔到幾多，對般尼茅夫之役有辦你睇，攻不銳守不穩，全無王者風範。

另外，李斯特城主帥雲尼亞里曾執教車路士，喺2004年正正係莫連奴入主而被逼走，之後返意甲教祖雲達斯同羅馬，同樣遭「寸王」帶領嘅國米食住，仲不時畀佢狂寸執教多年冇成就，依家難得「寸王」落難，雲帥仲唔有仇報仇咩？李斯特城主場出擊兼有得受讓筍到暈，斯維力撐讓球主勝。