拉素同森多利亞兩隊近況頹爆嘅隊伍，今晚喺意甲獨腳戲正面交鋒。拉素連日嚟都有激進球迷搞事，搵糞便掟去訓練場門口，仲唔「拿拿臨」做番齣好戲嘅話，真係唔知班Fans下次會掟咩。今鋪對住同樣低迷嘅森多利亞，拉素讓一球都照捧1.87倍上盤。

（TVB301周二凌晨3:45直播）

論近況，雙方一樣咁衰，大家近6場意甲都係未贏過。拉素嗰邊就比較濕滯，除咗話有激進球迷搞事之外，盛傳主帥皮奧利份工已經危危乎，意媒已經踢爆佢哋着手物色新帥，再唔盡快重返正軌嘅話，真係要執定包袱。

森多4連敗對賽曳
皮奧利都知形勢險峻，上周中歐霸盃分組賽特登派副選上陣，留力今晚同森多利亞死過，雖然球隊仲有大批傷兵，兼且有後衞梅里斯奧山度士停賽，好在中前場猛將好似菲臘安達臣同菲臘佐積域都可以披甲，火力依然有番咁上下。

森多利亞聯賽4連敗，「飛機仔」蒙迪拿接掌之後一樣救唔番隊波，加上佢哋近4次造訪拉素輸晒不特止，仲要1球都入唔到，家陣沉態出擊，撞正急欲反彈嘅拉素難逃一敗。