轟入24球多過車仔總和
試問喺季初嗰陣，邊個會估到李斯特城有力問鼎聯賽錦標，而車路士就喺下游徘徊吖？呢個你以為喺《FM》至會出現嘅情景堅係成真，今晚兩隊正面交鋒，李斯特城淨係「MV組合」馬列斯（Mahrez）同占美華迪（Vardy）嘅入波，都多過車路士成隊嘅總和，主場出擊仲要受讓平半，唔使諗咁多一於撐「狐狸」要下盤。

（now621台周二凌晨4:00直播）

李斯特城唔聲唔聲嚇你一驚，新季英超只係輸過1場咁大把，Keep住咁嘅表現嘅話，莫講話來季有歐聯踢，隨時爆個大冷拎埋今季英超冠軍都唔奇。風頭躉占美華迪固然Fit啦，雖然佢嘅連續入波紀錄已經斷纜，但雲尼斯達萊嘅紀錄已經畀佢破咗，健力士又頒埋證書過佢，仲冧莊做埋上月英超最佳球員添，信心同狀態都冇得頂！

雲尼亞里減壓冇訂目標
除咗「華Dee」之外，佢嘅前線拍檔馬列斯都唔講得笑，上仗鬥史雲斯佢就連中3元，淨係佢同「華Dee」新季已經夾手夾腳攻入24個英超「士哥」，比車路士全隊嘅總和仲要多7球，問你服未！今晚倒戈相向嘅領隊雲尼亞里唔敢輕敵，賽前表示有睇車路士喺周中歐聯贏波圖場波，大讚「藍戰士」踢得好，又話唔會為球隊定下任何目標，明顯係想幫隊波減壓，延續神奇之旅。

講到壓力，邊個夠莫連奴大吖？連日嚟都有消息話，如果車路士今仗有差池，「寸王」可以執定包袱。足足落後「狐狸」17分嘅「藍戰士」，剛啱係砌低波圖勇闖歐聯16強，但佢哋今季已經唔只一次疑似反彈之後又沉過，之前贏完基輔戴拿模，轉頭輸番畀史篤城就係一大例子。

莫帥亂點兵唔用法比仔
況且「寸王」今季壓力爆煲搞到走火入魔，一時搵前鋒羅拔堅尼地打左閘，轉頭又派個三九唔識七嘅貝特蘭查奧爾落場，用人用到九唔搭八，仲點信你呀？莫帥最近Drop咗法比加斯，班波踢落係順咗，但由泰利搭葛特蘇馬鎮守嘅後防，一個走晒下坡，一個又嫩口得滯，要頂住「MV」進襲有危機，仲學人讓波？梗係撐李斯特城啦！