歐聯強陣輸波心力交瘁
意甲今晚上演重頭戲，由祖雲達斯主場惡鬥費倫天拿。雖然「斑馬軍團」早前一度復甦踢出5連勝，不過球隊上仗作客以0:1敗走西維爾，難免打擊軍心，今仗對住連續9場不敗嘅費倫天拿未必贏梗，2.3倍讓客值得一試。（TVB301周一凌晨3:45直播）

費倫硬淨近9仗不敗
祖雲達斯上場歐聯D組為咗同曼城爭首名，喺早已出線嘅情況下，不惜精銳盡出硬撼西維爾，點知最後輸波收場，打斷球隊5連勝氣勢，可謂賠了夫人又折兵。佢哋嚟緊仲要分心周四意大利盃，同死敵拖連奴爭奪8強席位，今仗硬碰連續9場未輸過嘅費倫天拿，似乎冇乜着數。

相反紫合百收起攻守主力卡連歷、干沙路洛迪古斯等人，上場喺歐霸盃主場1:0順利殺退比蘭倫斯晉級，延續不敗走勢。更何況班波近3次造訪祖雲達斯新球場，取得1勝1和1負成績，表現並唔失禮，今仗大有機會搶分而回。