法蘭克福防線大穿窿
隨住拜仁慕尼黑聯賽不敗身被破，呢期德甲最Fit球隊，唔使問都知係多蒙特！近7場聯賽贏足6場嘅「蜜蜂兵團」，今晚會喺主場恭候防線大穿窿嘅法蘭克福，唔使諗咁多，「-2」照捧1.93倍「讓球主勝」，睇多蒙特炒鑊甘。（now670台、有線61、64、201及203周一凌晨0:30直播）

馬高盧斯森拜奴齊停賽
今季矢志衝擊聯賽神射手嘅奧巴美揚，近6場聯賽喪入7球，加埋馬高列奧斯同香川真司都嚟晒料，難怪多蒙特嘅火力喺德甲僅次拜仁。今晚呢個三叉戟又有機會Show Quali，皆因對家法蘭克福擺明等劏！

點解呀？事關法蘭克福近況已經沉，對上5輪聯賽全部失分之餘，並只係入得兩球咁大把。最大鑊係一對中堅馬高盧斯同森拜奴都要坐波監，加埋另一守將阿巴謙亦有傷在身，正式係攻又唔得守又唔掂，點頂得住多蒙特嘅進襲呀？