高手過招 留前鬥後
世冠盃半準決賽開打，亞冠盃盟主廣州恒大淘寶（足智彩譯FC廣州），今午出師大阪長居陸上競技場迎戰中冠盃得主CF阿美利加，呢兩支拉丁味濃嘅勁旅對碰，理論上一定搏拳，但係呢類一場過嘅淘汰賽，大家多數會留前鬥後，2.1倍嘅半場和開出機會，未必會細得過1.95倍入球大。（有線61、201周日下午3:00直播）

呢場中國、墨西哥王者嘅對碰，真係瓣瓣都半斤八両，足智彩個世冠盃冠軍賠率，阿美利加係30倍，恒大係35倍；今場嘅晉級賠率，阿美利加係1.83倍，恒大就1.86倍，可以話相差無幾。如果從身價去講，根據德國《轉會市場》嘅評估，阿美利加球員總身價約3,810萬歐元，略低於恒大嘅4,020萬歐元，基本上勢均力敵。

由莊家取態到身價數字，我哋可以得出一個概念，就係阿美利加、恒大屬於典型五五波。其實論整體戰術修養，墨超肯定好過中超，阿美利加配合方面可能優於恒大，況且呢隊波好平均，有16個球員身價响百萬歐元嘅價位，門將摩西斯蒙路斯、前鋒奧利比柏拉達都係現役墨西哥國腳，後者更係2012年墨西哥擊敗巴西奪取倫敦奧運足球金牌嘅頭號功臣，轉會身價達1,000萬歐元，係墨超No.1貴價球員，而且哥倫比亞援兵卡路士昆特路、阿根廷9號仔賓尼迪圖都質素一流，實力唔會弱過星光熠熠嘅恒大，阿美利加唯一用唔到嘅主將，就係墨西哥防守中場查維亞古美斯，事關佢脛骨斷咗要開刀，冇飛到去日本。

史高拉利以穩為先
恒大從國腳數目到球員名氣，都勝過阿美利加一籌。再者，世冠盃容許各隊派出7名外援落場，換言之羅賓奴、列卡度高拉特、艾傑臣、荷西保連奴、阿倫杜格拉斯等巴西兵可以悉數披甲，一定程度上緩解咗組織方面嘅不足，但以主帥史高拉利求穩嘅性格，即使係咁都唔會响淘汰賽冒險搶攻，半場打和有乜出奇。