同晚另一支倫敦球隊熱刺主場迎戰紐卡素，熱刺上場歐霸盃收起王牌前鋒哈利卡尼，仍然火力全開大炒摩納哥，狀態弗爆。紐卡素上周雖然爆冷擊敗利物浦，不過佢哋之前兩次聯賽贏波後都無以為繼，加上作客一直係弱項，熱刺讓一球、球半照捧上盤。

（now 622周一凌晨零時直播）

紐卡素上仗主場以2比0擊敗利物浦，取得今季聯賽第3場勝仗，不過球隊對上兩次聯賽贏波後都輸波，贏完諾域治、般尼茅夫後分別以0比3不敵新特蘭及李斯特城，水準欠缺穩定，而且佢哋作客表現遠遠不及主場，近5場作客只係贏過下游隊伍般尼茅夫，其餘4戰全敗，淨計對曼城、新特蘭同水晶宮，3仗夾埋失咗14球，防線甩漏情況嚇死人。

哈利仔復出添勝算
熱刺自從揭幕戰輸畀曼聯，聯賽已經保持14場不敗，當中主場先後贏過曼城、韋斯咸、水晶宮等前列分子，表現有保證。佢哋上周歐霸盃喺穩奪出線權嘅情況下收起首席射手哈利卡尼，結果憑拉美拿連中三元大炒摩納哥4比1，成功取得首名資格晉級，無論正選、後備都咁弗，預計今場哈利卡尼將會復任正選掛帥，攻力有增無減，就算讓波都冇有怕，「喜鵲」作客白鹿徑睇嚟難逃大敗。