皇馬上訴失敗，緣盡今屆西班牙盃！「銀河艦隊」月初西盃第4圈作客3比1擊敗卡迪斯，因違規派出本應停賽嘅卓利舒夫，被取消資格，會方之後提出上訴，但尋日被西班牙體育仲裁法庭駁回，正式被踢出局。皇馬亦需要將出售咗次回合門票，退回畀球迷。

西班牙體育仲裁法庭宣布，維持西班牙足總原判，皇馬首回合被判輸0比3，次回合取消，並罰款6,001歐元，皇馬上訴期間照出售次回合門票，依家惟有回水畀球迷。不過西班牙《馬卡報》指皇馬並冇表示接受判決，隨時再提供新資料上訴，甚至會告上民事法庭。

成肚火炸「潛艇」出氣
皇馬將於今晚西甲作客維拉利爾，皇馬知恥近乎勇，上仗歐聯例行公事，照大炒馬模8比0，今仗對手係前列分子「黃色潛艇」，勝負更為重要，相信「銀河艦隊」會搏老命爭勝。維拉利爾防線球員馬里奧加斯柏、邦利拿，前鋒巴迪斯達奧、阿祖安盧比斯受傷缺陣，招架唔住皇馬強大火力，直取讓球客勝。

（now 632周一凌晨3時30分直播）