買波切忌感情用事，雖然上周貼中華倫西亞逼和巴塞嘅下盤，但今晚「蝙蝠兵團」喺西甲作客伊巴，初盤開出平手盤兼高水咁筍，明顯熱唔透，肥叔決定捧有地利嘅伊巴。

（now 632周日晚11時直播）

肥叔最憎人冇料兼靠關係上位，華倫新帥加利尼維利係最新例子，呢位曼聯名宿喺電視台講波就頭頭是道，叫佢出山教波即刻現晒形。上周中歐聯分組賽華倫主場對已出局嘅里昂，係加利佬上任後首度領軍，由於佢哋必須贏波先有機會出線，大戶正正睇中「新帥效應」狂入華倫上盤，點知班波踢到不知所謂，最終淨吞兩蛋，搞到大戶們損手爛腳。今仗華倫作客伊巴，莊家開出平手盤，一來華倫名氣遠勝伊巴，二來上季兩度交手華倫皆贏波，而且伊巴今季主場錄得3勝2和2負唔算標青，但華倫唔使讓波之餘，仲有逾兩倍高水，邊有咁大隻蛤乸隨街跳呀？擺明係熱唔透喇，伊巴呢個平手盤值得趁機吸納。

至於西甲早場華歷簡奴主場對馬拉加，馬拉加不但聯賽作客未贏過，更連一球都入唔到，而且近五次聯賽造訪華軍輸四次，就算受讓平半都咪掂。

（now 632周日晚7時直播）