歐聯分組賽曲終人散，曼聯成為唯一出局嘅英超代表，認真羞家！球隊對住禾夫斯堡放棄控球戰術，結果反輸2比3，「戰術大師」尹戈爾就係要用出局嚟話畀大家聽：「都話我嘅控球踢法係最好，我以後打控球你哋唔好再嘈！」曼聯今晚喺英超作客般尼茅夫，睇嚟「紅魔鬼」會回歸悶爆踢法，1.7倍細盤唔怕追。

（now 621周日凌晨1時30分直播）

曼聯周中歐聯作客禾夫斯堡可謂非勝不可，領隊尹戈爾盡地一煲，放棄控球同對手上演一場開放兼快上快落嘅比賽，點知紅魔喺領先1球嘅情況下反輸2比3，完全暴露咗球隊防守不穩嘅弱點。

小豬被算帳罰停3場
曼聯中後場有大批傷兵，後衞勞基梳爾、達美安、馬高斯盧祖及基斯史摩寧今場英超缺陣，而中堅菲爾鍾斯同防中舒尼達連亦上陣成疑，「小豬」舒韋恩史迪加則因上輪聯賽對韋斯咸向對方守將雲斯頓列特批(月爭)，畀英足總秋後算帳罰停賽3場，由今場開始要做座上客。見到傷兵一大籮，尹帥今場仲會選擇狂攻般尼茅夫咩？曼聯近6場聯賽入得5球，以前嘅大炮依家變咗水槍，都係踢番最拿手嘅控傳踢法，將節奏拖慢，做好防守保住不敗，好過踢得好睇而全失3分吖！

般尼茅夫同病相憐
般尼茅夫上場英超爆冷擊敗車路士，就係靠死守博偷雞，今場對住另一支名牌，當然照辦煮碗，穩陣行先，邊會咁蠢無啦啦主攻曼聯？般尼茅夫今季相當黑仔，一眾主力包括前鋒哥林威爾遜、麥斯格拉度、翼鋒基斯甸艾素都要長抖，想入波都唔知靠邊個，今場唔慌多波入，一於捧1.7倍細盤喇！