倫敦雙雄危中有機
今夜歐聯分組賽煞科戰，仍要為出線苦苦掙扎嘅倫敦雙雄阿仙奴同車路士，將分途出擊硬撼奧林比亞高斯及波圖。喺分組賽猶如坐過山車嘅阿仙奴，領隊雲格若要保住連續16屆殺入淘汰賽嘅金漆招牌，今仗作客需要贏3比2或以上，或淨勝兩球；至於帥位危危乎嘅車仔領隊莫連奴嚟講，今仗絕對不能再輸，否則幾乎肯定要被炒魷，兩大名帥為名聲為飯碗為出線，誓要化危為機，今晚將盡晒籌碼孤注一擲，全球粉絲等睇好戲啦！