歐聯E組3隊爭搭尾班車
歐聯E組今晚上演最後一輪賽事，榜首巴塞隆拿已經穩奪出線權，餘下一個出線席位將由意甲嘅羅馬、德甲嘅利華古遜同白俄羅斯球隊巴迪爭奪。羅馬今晚主場迎戰巴迪，球隊喺實力遠勝對手下，度士相信佢哋有望大勝晉級，一於捧讓球主勝。

（有線63台周四凌晨3時45分直播）

畀波前先講吓E組嘅出線形勢，首名資格已由巴塞隆拿穩奪，剩低嘅一個16強席位就由羅馬、利華古遜同巴迪爭奪。現時羅馬與利華同得5分，惟羅馬以較佳對賽成績排第2，換言之佢哋只要擊敗巴迪就可以出線。相反利華古遜想晉級就要贏巴塞，同時寄望羅馬攞唔足3分；至於巴迪雖然排包尾，但只要今場作客擊敗羅馬，同時利華古遜贏唔到巴塞，就可以趕上16強嘅尾班車。

羅馬近4場波未贏過只得兩和兩負，球隊狀態唔算太好，但嚟到呢個關鍵時刻，相信球員都會集中精神應付呢場關乎出線嘅大戰。羅馬今場繼續有「王子」托迪同「埃及美斯」穆罕默德沙拿因傷唔踢得，但仍有迪斯高、伊度比同比真歷等好手在陣，加上首輪作客巴迪輸波，今仗勢必出全力報仇。

巴迪作客例腳軟
巴迪雖可夫添上陣，惜球隊喺今屆嘅歐聯，無論係外圍賽定係分組賽每憑作客都贏唔到，只係錄得2和3負嘅成績，今仗作客面對求勝心切嘅羅馬，相信都係凶多吉少，度士睇好羅馬可以大勝晉級，1.68倍讓球主勝趁熱食。

利華鬥巴塞吼和局
另一場利華古遜主場對巴塞隆拿，利華目標全取3分必主動搶攻，但球隊有後衞謝華積同南韓前鋒柳承佑缺陣，屬於可勝不穩嘅格局。至於巴塞每逢呢類例行公事，主帥安歷基多數會派副選上陣，不過呢班二線兵實力唔曳，而且難得有機會喺大賽上陣勢必搏盡，度士估計呢場波雙方會踢到難分難解，一於捧和波。

（有線62及202台周四凌晨3時45分直播）