作客「狼堡」禾都唔掂
歐聯最後一輪分組賽展開，「死亡B組」一步一驚心！禾夫斯堡主場惡鬥曼聯，到底今屆重返歐聯嘅「紅魔鬼」會否就行人止步備受關注。形勢上除非燕豪芬喺另一仗輸畀中央陸軍，否則曼聯今仗必須贏波先至可以晉級16強，無奈球隊近期鋒線死火唔識入波，作客「狼堡」要全取3分絕非易事。反觀禾夫斯堡和波就掂，冇必要同你硬碰，隨時主守同你玩拉布戰，今場首選入球細。

（有線61、201台周三凌晨3時45分直播）

攻力不濟 又冇朗尼
排第2位嘅曼聯僅領先第3位燕豪芬1分，由於燕豪芬今輪對手係已出局嘅莫斯科中央陸軍，贏波機會甚高。換言之如果曼聯贏唔到，好可能被燕豪芬反超前搶走16強席位。「紅魔鬼」目前形勢之下，幾乎係非勝不可，不過以佢哋近期低迷嘅表現，莫講話贏，要爭取入波都有難度。曼聯近10場賽事有9場開細，當中有5場開出0比0，上仗對韋斯咸，成班攻擊球員繼續冇着射手門鞋，21次攻門僅1次中目標，創下英超史上第4差紀錄，可想而知佢哋條鋒線有幾不濟。

事實上，曼聯上輪分組賽主場對燕豪芬都處於劣勢，賽和0比0已經執到。領隊尹戈爾無論點變陣，都解決唔到鋒力疲弱嘅問題，睇來佢已經黔驢技窮。加上隊長朗尼受傷缺陣，呢種關鍵時刻，球隊缺乏一位孭飛球員出嚟改變戰局，更加難突圍，照咁發展落去，曼聯今場隨時又食白果，分分鐘歐霸盃見。

禾堡求不敗目標明確
至於禾夫斯堡整體實力雖然唔算太強，大賽經驗亦稍遜，難免對曼聯有顧忌，更何況出線形勢佔優，只要唔輸即可出線，更加冇需要冒險，穩穩陣陣攞1分已經達標。呢支德甲球隊今季喺「狼堡」主場只輸過畀拜仁慕尼黑同多蒙特，兩場歐聯主場都贏晒兼冇失波，戰績非常硬淨，足以抵禦曼聯來犯，預計今場波唔會出現大手交易，捧細好正路。