拜仁慕尼黑教練哥迪奧拿被視為現今球壇最具級數嘅教頭，佢同拜仁份約到季尾就屆滿，但佢一直拖住唔續約，盛傳佢下季就會離開拜仁，轉戰英超。究竟哥迪奧拿有冇料？如果佢去到英超又可唔可以成功呢？
牽牛兄認為哥迪奧拿名大於實，巴塞隆拿同𠵱家拜仁啲球員咁勁，闔埋隻眼教都得啦！小弟就一直好鍾意哥迪奧拿，覺得佢係一位領先潮流嘅球壇實驗家。睇波超過十年嘅朋友，大家有冇發現有啲類型嘅球員越來越少？例如好似恩沙基嗰種純機會主義者、好似加度素嗰種純攔截型中場。因為球壇大勢，要求球員有全面嘅能力。前鋒不但要入波，仲要識組織，防守不但要跑得，仲要有控制大局嘅思維。
喺哥迪奧拿嘅球隊，呢種全能化嘅現象好明顯，𠵱家拜仁班中後場真係可以調亂晒嚟踢，個個都試過踢中堅、防中，因為喺哥迪奧拿嘅理念中，對中堅、防中嘅要求都係一樣，肯跑、肯傳同有腦，防守唔係靠個人，而係整體。有人認為，哥迪奧拿接手希歷基斯隊拜仁係零難度，但小弟認為，希歷基斯當時帶到拜仁拎三冠王，隊波到達咗一個高峯，照計應該會無可避免咁滑落，但喺哥迪奧拿帶領下，呢隊拜仁冇大下滑，而係轉變咗風格，長期保持歐洲前三嘅實力。
哥迪奧拿去英超的話，小弟覺得曼城係最好嘅選擇，因為英格蘭球員最少。小弟唔會話有邊種足球哲學係高人一等，但𠵱家當打嗰班英格蘭國腳應該會唔適應哥帥種踢法。如果哥帥揀去教曼聯，肯定會被嗰種淨係識分邊嘅英式思維激到嘔血。