贏完西甲，贏過歐聯，德甲又所向披靡，哥迪奧拿仲有咩挑戰性？就梗係去英格蘭挑戰吓摩連奴（如果下季仲在任）、雲高爾、高路普等名帥啦，曼城都開定張1,300萬鎊年薪嘅支票等哥帥拎，仲話挖走美斯等佢哋故劍重逢㖭。
講真，哥迪奧拿就真係神級，德甲開季至今只係失咗兩分咁大把。雖然多蒙特已經回勇，但拜仁都仲可以領先佢哋八分，第三位連尾燈都見唔到，大把條件畀哥迪奧拿玩新陣。對多蒙特已經玩過3-3-3-1陣式，對史浩克又玩4-2-2-2陣式，咁講真球員基本能力強，沙比阿朗素、查維馬天尼斯俾哥帥安排踢過中堅，拿姆又中後場咩位置都打過晒咁滯，連門將紐亞腳法好到可以出嚟踢清道伕，真係讓多蒙特10分都贏梗德甲，係睇吓拜仁贏唔贏到歐聯箒。
之不過英超領隊表面上就好似大權在握，但同樣壓力有番咁上下大，哥帥未必好似以前咁風流。講真英超各隊實力差距，比西甲、德甲都叫近，曼城上仗叫做大勝，但其實修咸頓都畀唔少壓力佢哋，傳統強隊曼聯、阿仙奴、利物浦，難保車路士下季又翻生，仲有奇兵熱刺、愛華頓，李斯特城一個唔覺意上榜首㖭；哥帥有更好牌都要場場小心應付。而且英國傳媒出名刻薄，狗仔隊又多，日後喺英格蘭做衰嘢，隨時上頭版。
之前香港傳媒就報道過，一啲跟唔上名校進度啲學生，轉去一個冇咁叻嘅學校，當堂升第一之餘仲開心晒，𠵱家就係好似哥帥咁，寧願去做山寨王，定去名校精英班死過。