由于嚟紧周中展开欧联8强首回合，参赛球队已喺上周六或之前打咗本土联赛，因此今晚赛事戏码麻麻，不如讲讲利物浦嘅埃及王子穆罕默德沙拿。
之前围绕沙拿嘅话题，离唔开佢深陷多场入球荒，呢位上季英超金靴得主，心急破荒反而变得坚独食，忽然成为「红军」负累。不过大家唔谂番转头，利物浦直到依家仍喺联赛继续咬住曼城唔放，冠军梦犹在，与季初沙拿单天保至尊、引领球队连场报捷有关，但成季流流长，球员受伤、状态起伏少不免，而且球迷忽略咗沙拿除咗入波外，佢喺场上嘅牵制作用亦好重要，昨晨赢修咸顿3比1之役，佢用靓波打破入球荒，有助重拾信心。
事实上，利物浦绝非完美球队，入波过于倚赖「埃及文明」锋线，中场球员入波特别少。我哋行内人都睇到，主帅高普又点会唔知，高普嘅优胜之处，就係靠自己嘅激情及人格魅力，让众将付出百分之二百为佢卖命，呢位德国主帅唔会因球员一两场失准而放弃咁短视，从沙拿喺入球荒期间持续上阵，显出高普用人不疑嘅一面。