新三叉戟勇不可当
周二凌晨欧国外A组重头戏，黑山主场硬撼英格兰。「三狮军团」喺哈利卡尼、史达宁及查顿辛祖嘅「新三叉戟」带领下勇不可当，今届欧国外取得完美开局，呢场面对实力一般嘅黑山有力再下一城，英格兰让一球、球半，上盘好路。
（有线662及602台周二凌晨3时45分直播）
「三狮军团」去年喺修夫基带领下，于世盃捲起青春风暴，以年轻球员为核心成功打入4强，创下近年最佳成绩，世盃后英军走势未有放慢嘅迹象，继欧国联力压劲旅西班牙同世盃亚军克罗地亚抢得A4组首名之后，上仗再喺欧国外首战狂风扫落叶以5比0击败捷克，迈出进军欧国盃决赛周重要第一步。其中上仗连中三元嘅史达宁门前把握力有明显改善，已成为独当一面嘅球星，配合年仅18岁嘅新星查顿辛祖，同能传擅射嘅前锋哈利卡尼，英格兰绝对有足够火力再全取3分。
黑山质庸祖维迪缺阵
相反欧国联表现欠奉嘅黑山，最终只取得C4组第3名，错失附加赛资格，想争欧国盃决赛周入场券，就惟有喺外围赛突围，可惜头号球星祖维迪长期缺阵，球队平均个人质素又麻麻，上仗就畀保加利亚逼和1比1，呢场好难同气势正旺嘅英格兰周旋，捧番上盘好过。