德军小鬼考牌
为期一周嘅国际赛档期，今晚由德国对塞尔维亚嘅热身赛揭开序幕。「日耳曼军团」经过欧国联耻辱降级后，主帅勒夫决心改革，今晚预计会由小将孭飞，喺大众汽车球场迎战当弗硬淨及具经验嘅塞尔维亚，两军嚟紧都有欧国盃外围赛硬仗要踢，热身赛唔慌去尽，投注首选细盘！
（有线662及602台周四凌晨3时45分直播）
勒夫推行改革需时
德国喺欧国联4战不胜搞到降级后，领队勒夫日前令人意外咁公布，国内班霸拜仁慕尼黑嘅3位重心球员晓姆斯、谢路美保定同汤马士梅拿唔会再入选国家队，同时徵召从未入选过嘅3位小将，包括RB莱比锡守将高路斯达文、哈化柏林守将历卡斯史达克同云达不来梅攻击中场艾格史甸，更预言未来阵容会大幅年轻化，希望採用新阵式新球员，加快国家队攻守节奏，今场热身赛正好係呢班小将嘅考牌战，不过阵容变化过大，新旧球员点都要时间建立默契，而且对备受压力嘅勒夫嚟讲，嚟紧星期日晚欧国盃外围赛作客死敌荷兰先至係「主菜」，今场志在试兵试阵，随时点到即止。
塞尔维亚喺世盃后虽有拿斯达锡同米利禾积域等拒绝再为国效力，不过领队卡斯迪积带领一班经验丰富战将，喺欧国联表现出色，6场赛事录4胜2和不败佳绩，取得升班资格兼至少获得欧国盃外围赛附加赛席位，除队长高拉洛夫同曼联防中尼曼查马迪够级数外，中后场战将绝大部分都喺5大联赛效力，打惯硬仗，前线富咸射手阿历山大米祖域同阿积士大红人杜辛泰迪治亦当弗，计实力绝对唔易啃。
塞军作客例缩
不过睇番欧国联佢哋有个特点，就係作客全开细盘。即使遇上立陶宛、罗马尼亚同黑山呢啲二线球队，塞军都只用单箭头，相当保守。何况佢哋嚟紧欧国盃外围赛亦要作客斗葡萄牙，唔会过分消耗体力，今晚仍然会以稳为先。