網絡上有個詞語叫「月經post」，指一啲每個月都會喺討論區出現嘅帖文，例子有「我覺得外星人就係未來人，你哋點睇？」。如果講足球討論區，都有呢類月經帖，最常見嘅就係「如果南斯拉夫唔分裂，隊波咪好勁囉！」，又或者「如果傑斯係英格蘭人，咁英格蘭係咪會拎到世界盃？」。其實，做繙譯足球新聞，都有成日見到啲「月經新聞」，真係每次見到都唔想理，例如基斯坦奴朗拿度（C朗、圖！）返曼聯咁。
呢排唔知英媒、法媒定西媒「姨媽」到，又喺度吹C朗想離開皇家馬德里，目的地又係曼聯、巴黎聖日耳門呢啲，感覺就好似睇緊上個月啲新聞咁。點解C朗成日俾人話返曼聯，好多時都係傳媒作怪，唔知聽埋邊啲經理人、消息人士講。好少少的話，就有C朗嘅說話做根據，例如每逢C朗個人專訪，又或者佢出席一啲非皇馬活動，都肯定有記者問佢點睇曼聯呢排嘅成績，仲有冇掛住曼聯咁。C朗對曼聯有感情係真，當然會答到好客氣，話曼聯係第二個家或者好多謝曼聯嘅栽培咁，再搭多句唔排除第日返去。
啲傳媒老闆見到呢啲訪問就會好興奮，起晒題話C朗返曼聯。OK！如果係C朗第一次咁講，冇問題，第二次咁講，都可以咁起，但講真，小弟都聽咗C朗講呢啲客氣說話講咗五年，搞到曼聯球迷都FF咗五年。的確，起條題話「傳C朗重返奧脫福」會吸引到好多人入去睇，因為呢條題係賣緊一份情懷，勾起曼聯球迷嘅美好回憶。與其話曼聯球迷想C朗回歸，不如話大家都懷緬過去嘅輝煌同青春。