皇家馬德里，好聽啲就叫銀河艦隊，難聽啲，只不過係球星轉口商，球員只係主席佩雷斯（圖）麾下啲搵食工具，當打有星味，佢老人家就梗係當你仔咁錫，都有番咁上下年紀，星味下降，就隨便踢你出門口，奧斯爾如是，迪馬利亞如是，連多年隊長卡斯拿斯都如是，基斯坦奴朗拿度（C朗）又點可能喺皇馬終老。
C朗下年頭就31歲，以佢03年已經喺曼聯成名，多年嚟喺球會及國家隊都係必然主力，加上講求體力化踢法，如果唔係佢私生活檢點，亦都勤做Gym，真係未必今時今日仲可以咁「弗」。但狀態始終都有下滑一日，皇馬都吹晒風想放人，趁C朗仲有多少價值搵多筆，準備買下一位新星。
畀着C朗都心淡走人，雖然好多人都預計C朗返英超，特別係碧咸仲話說服佢返曼聯㖭，不過其實C朗喺曼聯乜盃都拎過晒，有摩連奴呢個人辦你睇，食回頭草成功就冇事，一失敗就俾人圍插，所以唔太信佢返曼聯；歐洲球壇出得起錢嘅球隊冇邊幾隊，PSG就係其中一隊。
巴黎上星期發生恐襲，搞到大衛雷斯、卡雲尼呢啲外援怕怕，本來C朗身驕肉貴應該打消去PSG搵食念頭；不過趁立立亂仲去巴黎，C朗簡直就係救世主一樣，個人形象都提升晒。而且法甲一隊獨大，以PSG人腳，半力都夠贏里昂、馬賽之流，基本上年年都可以專心歐聯，伊巴咁嘅年紀都可以呼風喚雨，對C朗延續球員生涯都好有幫助。而且講真，巴黎始終都係歐洲一線城市，靚女靚車一街都係，C朗又點會悶，經理人文迪斯快啲做嘢啦。