今晚有2场英超，先有前菜爱华顿对般尼茅夫，仲有压轴好戏热刺火併曼联。热刺与红魔应该系近期状态最弗嘅球队，的确自圣诞新年快车至依家，两队都连场报捷，比起曼城、利物浦、车路士及阿仙奴更为突出，因此今仗正面交锋，备受关注。热刺今季反璞归真，班主揿住荷包唔科水，主帅普捷天奴却令球员众志成城，并透过出色的调兵遣将，不但在欧联、英联盃及英足盃均顺利过关，于联赛位居前列，更系今季至依家唯一非赢即输（16胜5负）、未曾和波嘅英超球队，睇得出佢的嘅争胜决心。
改玩进攻足球有运行
另一边厢，曼联怒炒「寸王」摩连奴之后，即刻士气大振，我之前在专栏都提过，只要继任人做「寸王」嘅相反版本，红魔自然会止跌回升，果然喺苏斯克查接手后，放弃绑手绑脚嘅打法，大踢进攻足球，众将开心之馀，成绩亦立即反弹，联赛连盃赛在内，「苏B」领军后5场赢晒，虽然对手系偏弱，但打波有时系打道气，现时红魔气势如虹，比起「寸王」过于谨慎、就算左闸劳基梳尔助攻都要搵几个球员补位防守嘅做法，「苏B」鼓励球员多进攻、多走动做前场压迫嘅战术，更受球员及球迷欢迎。由于两队都咁弗，预计会合演入球骚，喺胜负难料下，随时一团「和」气。