今晚英超头7场波，只谈近况不论牌面，除左修咸顿作客哈特斯菲尔德有机会抢分外，其馀几场主队赢面可以话系高唱入云，当然更值得着墨嘅，肯定系周日凌晨开波嘅卡迪夫城主场对曼联。
卡迪夫城今次有难了，皆因佢的要面对刚刚将前领队「寸王」莫连奴扫出门口嘅曼联，一班「红魔」球员如今重见天日，肯定要以好表现摆脱颓势，话畀外界知佢的本来系识得赢波，只因领队嘅打法唔岩而阻碍左球员嘅发挥。以笔者几廿年睇波经验所见，有实力嘅球队成绩陷入低迷，好多情况都同教练无法控制球员有关，士气同更衣室失控，绝对是足球场上嘅兵家大忌。
今晚曼联改由前名宿苏斯克查接手，众将必定打争气波，「红魔」威力随时返晒嚟，所以我对曼联今场作客取胜相当有信心。相反卡迪夫城认真唔好彩，如果莫连奴继续在位，呢支威尔斯球队都仲有抢分机会，如今时移世易，情况唔同晒，宁愿睇好曼联成功翻身踢出好成绩。
今晚英超头七主胜机高，尾场卡城对红魔就难咯