上輪英超，紐卡素嘅韋拿杜姆一個入四球，呢個球員都勾起小弟唔少回憶。早幾年玩《Football Manager》（下簡稱《FM》）嗰陣，上網睇攻略話佢係妖人，所以佢17歲時，就簽咗返嚟。
喺咁多隻足球電子遊戲入面，《FM》嘅球探團隊真係最專業。每次一出，最多人留意嘅，就係邊個係「-10妖人」。《FM》會畀每個球員一個最高能力值，代表球員嘅潛能，呢個數最高係200。除咗1-200之外，《FM》會畀年輕球員嘅最高能力值做-10、-9等，負數係代表嗰個球員嘅最高能力值係隨機所得，-10就最勁，最高可能隨機到200，所以最高能力值-10嘅年輕球員，就代表《FM》球探團隊最睇好嘅新秀。
不過，一個-10妖人可唔可以成才，有好多因素，例如要夠實戰；同埋，仲要睇一啲隱藏數據，包括容易受傷程度、職業素養。就算係-10妖人，假如佢好易受傷，成日缺操，真係打機都好難練到出嚟，更何況現實有更多因素影響一個球員嘅成長。艾朗藍斯可以話係代表人物，佢做過兩年-10妖人，點知一次斷腳，差啲玩完。
黃子華講過，你有幾多嘅潛能，就代表你有幾多嘅無能。人哋話你好高潛能，其實唔係讚你，而係同你講，你離開兌現你嘅潛力極限仲有好遠嘅距離；對於-10妖人嚟講同樣。今年《FM》得一位-10妖人，就係安德列治中場泰利文斯，希望佢唔會因為呢個稱號而沾沾自喜，因為佢兌現潛力極限嘅道路，會比其他人更長、更遠。