雖說《FM》呢個game以真實性見稱，仲話搵唔少歐洲球探攞料，所以資料庫中，特別係年青球員嘅潛質都非常精確，搞到唔少領隊或者教練都透過呢個game搵新兵，好似阿仙奴領隊雲格就講過參考過佢買人，紐卡素領隊麥卡倫更加跟住《FM》嘅妖人（Wonderkids）照單執藥，除咗韋拿杜姆，前鋒阿歷山大米祖域同中堅贊素梅賓巴都係安德列治時期嘅妖人。
如果玩吓電腦game就可以買到好球員，你同我都可以做領隊啦。小弟冇玩呢個game都幾年，記得初代都有唔少妖人，好似尼日利亞前鋒阿加荷華（Julius Aghahowa），當年踢薩克達已經係《FM》出名妖人，中前場任何位置都打得，遊戲入面閒閒地一季入20球同10個助攻；但踢到今時今日，有幾多球迷仲記得佢，佢連韋根都踢唔掂，31歲已經冇班落要退休。
所以一個妖人能否真係成為巨星，除咗體能、天賦等硬件外，心態都好緊要；史達寧（圖）喺利物浦時代已經係妖人級，上年拎埋金童獎㖭，成功跳草裙舞過檔曼城一登龍門。雖然佢數據上都叫做漂亮，聯賽累積四個入球只係少過阿古路，但坦白講，真係見唔到佢有成長。心態上唔見佢積極，成日埋怨領隊比歷連尼安排佢踢較唔慣嘅左翼；私生活亦都唔檢點，月中踢完英格蘭嘅國際賽，又被人影到食水煙。冇錯，C朗都曾經有年少輕狂嘅一刻，曼聯時期滾到出晒面，但收心養性後先可以踏上球王之路。我唔覺得史達寧天賦比得上C朗，再唔努力，就好似流星一樣，一閃即逝。