今晚热身赛有重头戏上演，由荷兰主场恶战法国。「橙衫军团」自从喺欧国盃外围赛出局后引入更多年轻球员重建队波，今仗面对近期表现勇勐嘅法国，怕且班荷兰小将都要交吓学费先得，捧2倍客胜。

（开赛时间：周六凌晨3:45）

荷兰上年喺欧国盃外围赛A组，竟然畀一众欧洲二线球队捷克、冰岛同土耳其压住，结果佢哋连附加赛资格都攞唔到，直接宣布出局，认真丑怪。嚟紧荷兰要尽快重建好球队，以免重蹈覆辙，如果唔係连下届世盃决赛周席位都不保喎。

法国基沙文 普巴攻坚火力劲

睇番「橙衫军团」今次大军名单，佢哋只得前锋亨特拉尔、中场史奈达、后备门将华美亚年过30，3大锋将洛宾、尹佩斯、巴斯杜斯都冇入选，火力得番几多实属疑问。更何况呢班波只得1名正式右闸，仲係要从未喺国际赛落过场嘅飞燕诺守将卡斯杜柏嚟添，呢铺摆到明试阵培训新血，咁搞法真係拣唔落手咯。

另边厢嘅法国为认真备战欧国盃，可谓精锐尽出，前锋基沙文、中场保罗普巴、守将哥斯尼均可候命。况且队波表现稳定，近6战取得5胜1负成绩，手下败将包括德国、葡萄牙等名牌球队，既然对手呢铺试阵为主，相信一众法国国脚都会把握机会骚哥利，入多2粒争得主帅迪甘斯欢心啫。