呢轮国际赛档期的确好波连场，唔少名牌球队将分途出战，其中啱啱反胜德国3:2攞晒彩嘅英格兰，回师主场迎击荷兰。赛前两军正选门将毕兰特、施利臣均告受伤，对球队防守力造成影响，再讲「三狮军团」中前场新人辈出，所有球员都必须为保住自己位置搏命，呢次对住攻强守弱嘅荷兰，誓再上演一场入球骚，2.02倍入球大值得捧场。

（开赛时间：周三凌晨3:00）

英格兰上仗凭住前锋哈利卡尼、占美华迪同中场艾历迪亚嘅入球，以3:2反胜德国，演出赢尽掌声。其中后两者更攻入个人首个国家队士哥，大大提升自己喺主帅鹤臣心目中嘅形象，据讲佢老人家今仗好大机会畀李斯特城中场真禾特攞到首顶喼帽添。家阵成支英军朝气勃勃，今次喺乡亲父老面前献技，边肯放软手脚先？

前锋争位唔敢唔搏

随住一个个新人弹出，依家点到一班旧部，包括前锋史杜列治、禾确特等人唔担心，惊自己到时喺场边做观众睇欧国盃呀！今仗实行要全力开火抢番鹤臣欢心至得。事实上「三狮军团」呢排演出稳定，近8仗取得7胜兼攻入21球，近2仗斗德、法两大劲旅更合共攻入5球，火力毋庸置疑。不过门将毕兰特打柴，鹤臣亦可能会搵中坚史东斯担正进行考察，防守始终有隐忧。

荷兰近6仗失13球

讲防守荷兰仲唔掂，呢支缺席欧国盃决赛周嘅褪色劲旅，已经连续6仗未能保持清白身，合共失咗13粒，呢铺佢哋仲要冇埋门将施利臣帮手，都咪话唔牙烟。好在翼锋迪比返到国家队有起色，上仗斗法国交出2个助攻，呢次对英格兰肯定使出浑身解数，务求令由季初弹到佢依家嘅球迷收声。考虑到「橙衫军团」近9次对英格兰，只係得1次冇货交，相信佢哋今仗都唔会空手而回。