另一场热身赛戏码亦相当强劲，由两支欧洲劲旅互撼，德国主场迎战意大利。话就话德国係世盃冠军，不过佢哋踢热身赛就一啲霸气都冇，连埋上仗畀英格兰绝杀，「日耳曼兵团」近6场热身赛只係赢得1铺咁大把，偏偏意大利近年对住德国未惊过，对上6次交手从未输过畀德军，呢铺佢哋受让梗係抵玩，2.1倍「让客」唔好错过。

（无綫翡翠台、TVB13周三凌晨2:45直播）

德国自从捧走大力神盃后Keep住漏气，踢亲太公波都揸流摊，6场波淨係赢得1铺，坚肉酸。上仗斗英格兰更令捧场客失望，够胆死领先2球都反输3粒完场，睇得出班波几有「斗志」。

德国点兵缺竞争性

讲真吖，领队勒夫呢次点兵诚意欠奉，贺芬咸前锋禾兰、史特加中场迪达维、慕逊加柏中场史甸度、史浩克门将费文等今季有表现嘅新星一个都唔拣，偏偏选入普多斯基、马里奥高美斯呢啲老将，搞到成队波冇乜竞争，班球员完全冇危机感仲边会同你搏命先？再加上中场根度简、守将谢路美保定因伤落选，进一步打击实力。

相反意大利人脚名气虽然冇德国咁大，但踢起嚟就活力十足，上仗亦同另一劲旅西班牙斗个不分高下，今仗再战德国绝对有力一拚。值得留意嘅係，「蓝衫军」对住德国真係惊都未惊过，最近6次交锋，意大利取得3胜3和不败佳绩，可以称得上係德国剋星，今仗受让仲点可以错过吖！