朗尼英军Last Show点安排我都照做
英美大战办告别惹争议

周五凌晨热身赛英格兰坐镇温布莱对美国，今仗可谓别具意义，已离开「三狮军团」成年嘅朗尼意外获徵召踢告别赛，惹起唔少争议。呢位英军「士哥王」今仗第120次为国效力已成焦点，佢喺记者会表露心迹，话唔会有任何要求，领队修夫基叫佢做乜佢都会听！
（有线601及661台周五凌晨4时直播）

33岁嘅朗尼除左系英格兰近年其中一位最具标志性嘅球星外，同时亦系英军一个时代嘅见证者。喺爱华顿初出道时被冠以「神童」之名，2004年欧国盃横空降世，可惜当年随住佢喺8强伤出，英军最终黯然出局，呢次经历亦成为朗尼英格兰国家队生涯嘅一个缩影。
球迷名宿指唔尊重对手

朗尼其后转投班霸曼联，喺各球会级赛事获奖无数，可惜去到国家队每每令球迷失望。长期担任英格兰正印前锋嘅佢，纵使身边拍住谢拉特及林柏特等世界级队友，始终冇奖盃落袋。随住朗尼喺去年8月23日宣布退出国家队，专注球会赛事，当年「黄金一代」正式落幕，新一代「三狮军团」亦喺领队修夫基带领下展开新一页。「月巴」今次获得徵召，佢坦言冇任何要求，做后备踢一阵都冇所谓：「我同修夫基讲，无论佢想我喺呢场比赛做羊，我都会努力完成，因为今次系我最后1次代表国家队上阵。」不过今次英军嘅决定，引起唔少球迷及名宿不满，质疑将国家队比赛随便攞嚟作球员告别赛呢种做法，系对国家队球员身份同对手嘅唔尊重。

征欧特醒 捧美国先入波
无论如何，朗尼都成功将今次热身赛嘅焦点聚左落自己身上，难免畀人感觉英格兰有轻敌之嫌。尤其对手美国经历失落世盃决赛周嘅惨痛打击，今场依然有唔少好波之人压阵，包括基斯甸普列锡同添莫菲韦亚都分别喺顶级欧洲联赛揾食，实力唔曳，加上美国近3次作客面对欧洲球队，都反客为主先取得入波，今场随时一开波就抢缰，为「月巴」告别赛「赠兴」，一于捧美国第一队入球。