最近傷癒復出嘅拜恩（Kobe Byrant），喺ESPN今屆現役球員排行榜居然被列為93位，連喺中國打緊季前熱身賽嘅快艇老將皮雅斯（Paul Pierce）都為他抱不平：「ESPN好多評論員都唔知自己講咩，至少我喺聯盟中搵唔出92個比拜恩更強嘅球員。」
 花絮︰收飛黨食白果
中國賽隔多年再次落戶深圳，小記甫抵達現場即遇到唔少大媽大叔截車，了解後先知佢哋唔係黃牛黨，佢哋只不過係趁全場爆滿，想借機會收飛再轉售賺錢，現場所見，收飛黨大約有10人，不過就唔見有人割愛。
 花絮︰中國飛人都睇MJ
大運體育中心場內星光熠熠，除一眾NBA名宿，藝人余文樂、前NBA球星易建聯同中國飛人蘇炳添都係座上客。蘇炳添仲透露中學時最鍾意公牛同佐敦，目前最愛球隊係熱火，至於現役球星就係湖人嘅拜恩。