講起啲名大於實嘅中鋒，第一時間就想鬧爆迪亞高哥斯達，入咗籍踢西班牙毫無建樹，仲拖累隊波。不過，最悲慘嘅唔係有個抵鬧嘅中鋒，而係連想鬧都冇得鬧。
葡萄牙呢次揀咗兩個中鋒，一個基斯坦奴朗拿度（C朗），一個艾達盧比斯。C朗根本係翼鋒，或者畀個型啲嘅名佢，就叫前場自由人。至於艾達盧比斯，真係提嚟都嘥氣，佢喺史雲斯都冇正選，但竟然可以入到國家隊，原因只有一個──葡萄牙真係搵個中鋒都冇。
國家隊冇人才，意味住個聯賽肯定出咗啲問題。波圖、士砵亭同賓菲加係葡萄牙嘅三大球星搖籃，但三隊都唔係搵自己友打中鋒──波圖係阿布巴卡，士砵亭係杜費路古迪利斯同施利文尼，賓菲加就係莊拿斯干卡維斯，三大勁旅嘅主力中鋒都係外援。數埋中游，里奧艾維嘅係佛得角嘅希頓拉莫斯，艾斯杜尼嘅係巴西嘅里奧邦拿天尼；布拉加就幾亂，幾個前鋒輪流踢，但大部份都係外援嚟。數到去費利拿，先有個祖奧施華係葡萄牙人。抽第五輪葡超出嚟睇，九場比賽有21名中鋒踢正選，15個係外援，得六個係土炮。
葡超球隊鍾意用外援前鋒好普遍，無論勁旅定升班馬，寧願搵啲巴西或者非洲球員，都唔鍾意用葡萄牙人。鬼叫去南美、非洲買人平靚正，仲有轉售圖利嘅潛力咩！結果越嚟越多球隊，越嚟越唔畀機會青訓，每下愈況，每況愈下，冇人正視問題，國家隊就成為受害者。