歸化球員其實都係兩面刃，好似香港靠國內、非洲歸化兵踢出近年佳績，球隊亦士氣高昂。相反，歸化兵一旦融入唔到球隊體系，甚至可以搞散隊波，迪亞高哥斯達（DC）𠵱家就好似西班牙嘅負資產。
先利申，小弟係廠迷，但踩DC唔係因為佢喺「車阿戰」中啲衰嘢；講真佢嘅揦鮓招，連身邊一啲車迷都睇唔過眼。呢位巴西出生嘅前鋒，論腳法真係唔算太好，但控球能力唔錯，又有六呎二吋高，對出現中鋒荒嘅西班牙叫做眼前一亮。不過，DC入唔入籍嘅態度曖昧，搞到上年三月先首次代表西班牙；球隊當時主流又係巴塞同皇馬幫，嗰陣仲效力緊馬體會嘅DC，同隊友合作不足就匆匆出戰世界盃。佢擔正做前鋒，除咗對荷蘭博到12碼，真係冇咩建樹；分組賽頭兩場大敗出局後，最後一戰更加唔使踢。嚟到今時今日，DC九次代表西班牙只入一粒，以球隊強勁攻力加上外圍賽可人戰績，真係唔收貨。以往西班牙最強盛時期，就係學巴塞踢法玩控球在腳，無鋒陣反而更機動，𠵱家前線多咗柱躉仲塞車，影響進攻效率。
DC因為停賽，今輪國際賽唔使預佢，小弟反而替教練迪保斯基鬆一口氣，唔使再刻意安排戰術遷就。講真西班牙都有唔少新晉前鋒，祖雲達斯嘅艾華路莫拉達身材高大，但唔係一味留喺禁區頂等機會之人，一樣有側擊同突破能力，加上華倫西亞前鋒柏高艾卡沙都係有速度之人；相反DC伴隨車路士近期一樣沉，冇佢份一啲都唔係損失。