嚟緊呢輪英超有場重頭大戰，就係阿仙奴主場對曼聯。同牽牛兄講開，佢話兵工廠有個大毒瘤，小弟仲以為佢想講「銀河唯一基奧特」，但佢話艾朗藍斯仲差。至於曼聯方面有咩毒瘤？小弟喺即時評論講過朗尼兩次，都唔想再寫多次，但前諗後諗，曼聯最大嘅毒瘤真係非肥仔莫屬，好難諗到第二個。
不過，呢次就講啲正面嘢，希望朗尼認清自己嘅定位，等信心快啲返嚟。朗尼今季第一場踢攻中嘅比賽係對修咸頓，存在感幾乎等於零，當隊友傳波畀佢，佢就回傳，冇嘗試自己帶波上前；呢種情況已經唔關狀態差事，係意識問題。雲高爾嘅戰術強調唔准輕易失控球，加上朗尼呢場係今季首次踢攻中，所以踢到患得患失，傳球同帶波太保守，保守到好似踢防中咁。一來佢未習慣踢攻中，二來自信唔夠。
上輪對新特蘭嘅上半場，朗尼嘅情況冇改善，但當佢食咗安東尼馬迪爾嗰球餵到落喉嚨嘅大禮後，見到佢信心強咗好多，由隱形變成間中出現吓。喺下半場，見到朗尼敢轉身向前引球推進，但當然仲有好大改善空間。例如每當分邊畀路爾斯華倫西亞後，以前嘅朗尼畀完波係會馬上衝入禁區接應，但𠵱家佢嘅侵略性反而低咗，甚至覺得比以前踢得hea咗，呢方面需要雲高爾督促吓。
有人同小弟講，一個攻中識轉身推吓波就感動到球迷，咁呢個攻中真係廢到無倫；但朗尼係曼聯一個割不得嘅毒瘤，難得見佢有番啲進步，都希望佢可以慢慢上番力。