摩連奴回歸英超，但發覺老費退咗休，雲高爾唔係好理佢；賓尼迪斯又返咗西班牙，羅渣士就唔入流，鬥嘴目標得番雲格。社區盾輸完又好，聯賽贏番又好，兩人總係隔空駁火，就好似大台早輪《四個小生去旅行》，「四哥」大戰「染髮哥」一樣，差在寸王未兜巴星落雲格度。
本來呢場口水戰都幾小學雞，好似雲格寸摩連奴首次拎英超錦標，只係靠雲尼亞里剩低嘅班底；摩連奴就寸阿仙奴有冠軍陣容、冇冠軍領隊云云。坦白講，阿仙奴陣容都係「比上不足，比下有餘」，爭到前四已經叫合格。以往雲格稱霸英超，皆因當時競爭仲未好激烈，好多時都係同曼聯單打獨鬥，講落仲有啲隊運，後防「四大長老」加埋施文竟然冇乜傷患；雲格當時用人又有一手，特別善於改造球員，好似羅倫由右翼改打右閘，龍格保中前場任何位置都打得咁滯，慳番唔少錢。
用番呢條橋，雲格又想將中前場通天老倌嘅任務交畀艾朗藍斯。小弟上季喺本欄鬧過藍斯仔，但以佢開季表現嚟講，真係又要我出手。以威爾斯球員嚟講，藍斯確係有天份，講唔上係毒瘤；不過，佢踢吓踢吓已經24歲，天份唔可以當飯食。
因應戰術需要，雲格會派佢踢右中場、進攻中場或防守中場；佢開季好多時都踢右中場，但衰在貪功，成日推番埋中間造波，搞到中路塞車，又變相少咗同比利連「叠瓦」，影響球隊運作。高基連早排受傷，藍斯喺有需要時最好都係打番防中，推番辛迪卡索拉上攻中，咁先做到左右路攻勢平衡。