季前，大家都估計呢季英超會係曼城同車路士爭標，點知踢咗幾場，曼城對辦全勝，反而上季冠軍車仔就只贏得一場，排緊尾四。車仔突然漏油，做車長嘅摩連奴當然責無旁貸，但唔少球員都冇咗上季嗰股銳氣，其中中場法比加斯（圖）就好似一個冇咗靈感嘅詩人一樣，傳球威脅大減。
上季，法比一共喺聯賽交出18次助攻，但今季踢咗三場都冇助攻。法比今季仲有項數據明顯下跌，佢上季場均2.8次為隊友製造埋門機會，但今季大跌至1.6次，平均每場少咗一次有多，跌幅超過四成，變成一個平庸嘅工兵，傳球滲透性低，更好少走到對手禁區入面幫手。
其實，喺上場聯賽對愛華頓，摩連奴對法比嘅用法已經有唔同，摩帥派埋約翰米基爾正選踢防中，希望可以解放法比上前線，減少法比防守工作，專注更多心機喺進攻之上。不過，睇番法比對愛華頓時嘅觸球分佈圖，佢只有一次喺禁區內掂波，而喺傳球分佈圖方面，只係得一腳成功交到去禁區內隊友腳下。難怪英國輿論都開始批評法比，其中《每日電訊報》甚至話佢已經係車路士嘅負擔。不過，車路士之頹，法比並非唯一一個要孭鑊嘅人，其餘包括被人爆到頭到暈嘅伊雲洛域。
講真，每場車路士對手都好似有世界級左翼咁，例如謝法臣蒙迪路、韋費特沙夏對住車仔都踢到光芒四射，真係多得晒伊雲。嚟緊對阿仙奴，相信阿歷斯山齊士會有唔少表演機會。