經過五周聯賽，曼城排榜首唔意外，車路士排第17，就真係幾得人驚，而且累積失12球差絕英超，曼城、阿仙奴同曼聯上季二、三、四位加埋嘅失球，只係車仔嘅一半，好多人都跌眼鏡，真係唔明摩連奴搞緊乜。
車路士失準，好多人話球隊老化問題，不過摩連奴唔係未嘗領一班老將化腐朽為神奇，2010年帶國際米蘭成就三冠王，辛尼迪、盧斯奧、森美爾、馬特拉斯全部三字頭，歐聯晉級過程頂住巴塞，決賽令拜仁食白果，絕對唔係僥倖；相反車仔老將今季就真係失準，泰利已經唔係以往鐵血隊長，伊雲洛域就成為對手喪爆對象，亦都踢到冇晒心機。寸王以往最叻就係刺激球隊士氣，幫到佢賣命，好似摩連奴初去皇馬，想卡維奴過檔幫手，卡維奴講過游水都會去馬德里報到，杜奧巴仲誇張，話車仔上下都用老竇嚟稱呼摩連奴。
車仔𠵱家搞成咁，點解以往咁威風嘅老竇都搞唔掂呢？睇英國報章就好似大台啲連續劇咁，總會唔知點解聽到好多內部到唔內部嘅新聞，好似直頭有臥底派駐各大球會更衣室個儲物櫃咁，對車仔一沉百踩，出現DC同泰利不和、摩連奴買人有制肘等等傳聞；球隊分黨分派就絕對唔係新鮮事，摩連奴曾經教過嘅皇馬，黨派之爭仲勁，但佢一樣搞得掂。話買人有制肘，其實都係愛華頓死都唔放史東斯箒，但摩連奴自波圖後，從未教過一隊波連續多過三季，今季係佢重返車仔嘅第三季，我信呢個三季魔咒多啲，車仔都係準備搵新領隊。