傳曼聯話買基沙文好耐，但基沙文一直都冇回應，直至近日佢上電視節目，話下季做紅魔嘅機會有六成！不過魔迷唔好開心住，因為基沙文似乎數學麻麻，佢補充話留低喺馬體會嘅機會仲大喎：「我會喺嚟緊兩星期決定前途。（曼聯係咪下一站？）有可能，我覺得有六成機會。」不過，被問到留低喺馬體會嘅機會嗰陣，基沙文竟然話有七成機會！大佬呀，七成加六成有13成，呢啲係咩數學嚟？
 連格爆肌試PS老西
曼聯周三踢決賽，賽前特登搵咗設計師Paul Smith整番件新老西出征，連受傷嘅伊巴同前領隊費格遜都有份，因為佢兩個都會隨隊打氣。曼聯官方發佈咗幾張球員試衫嘅靚相，係連格試得最搞笑，竟然赤裸上身試衫，擺明晒肌。講起連格，佢喺英超煞科戰後去咗奧脫福附近一間酒吧，使咗600鎊（約6,100港元）請約100名魔迷飲酒，話係多謝佢哋嘅支持。
 乳牛牽牛勢不兩立
本報名家牽牛睇好曼聯，但地球另一邊，荷蘭有隻牛就同佢唱反調，支持同鄉阿積士。呢隻荷蘭乳牛叫Sijtje，係動物界波神。日前工作人員就畀咗兩個飼料兜Sijtje揀，一個有阿積士會徽，另一個就有曼聯會徽，最後佢揀咗阿積士。雖然佢名氣冇當年世盃嘅八爪魚保羅咁大，但根據佢過往估波以至大選結果嘅往績，命中率高達85%！信牽牛定信乳牛，大家自己揀喇！