今晚英超圣诞快车焦点战，车路士主场硬撼般尼茅夫。车仔伤兵名单一疋布咁长，仲有部分参加世盃嘅国脚放假，阵容严重不整，而且箭头奥巴美扬脚风欠顺，搞到攻力不济，般茅作客必定玩死守博偷鸡，宁捧2.5球嘅入球细。（Now 621周三凌晨1时30分直播）

虽然世盃打咗成个月，但车路士伤兵问题未见改善，除咗罗夫度斯卓克、尼高路简迪、韦斯利科芬拿、芝维尔仍要休养外，美臣蒙特亦带伤而回，前锋布查更喺早前热身赛对阿士东维拉重创要提早收咧，高华锡及薛耶治因出战世盃到最後阶段，因此亦获得休息，阵容颇为不整。

奥巴美扬陷入球荒

尽管车仔箭头奥巴美扬冇份踢世盃，不过佢脚头无灵，今季加盟後联赛入得1粒咁大把，对车仔攻力无甚帮助。车仔唔单止世盃前联赛连盃赛3连败，喺休战期同维拉「拍跳」亦输0比1，而呢4仗竟然1球都入唔到，全开2球或以下，攻力差强人意。

另一边厢，般尼茅夫嘅暂代教头加利奥尼尔，因为领军後令球队成功止跌，近日获得扶正，有助稳定军心。般茅在上周中英联盃16强对住纽卡素，只因乌龙波而饮恨，表现唔曳，依家要继续为护级抢分，作客劲旅一定摆铁桶阵，随时令车仔老鼠拉龟冇碇埋手，2.5球入球细有分头更值博。