经过世盃短暂休战後，苏超今晚重开，打头阵系「2哥」格拉斯哥流浪主场迎战喜伯年。格流喺休战期间换领队，新帅米高比尔必想赢波开个靓头，撞正状态沉到冇朋友嘅喜伯年，必定抢缰博打响头炮，半场主胜值得捧场。(Now 638周五凌晨4时直播)

格流连续两季季中易帅，上季因维拉撬走谢拉特无奈要换人，搵来球队名宿云邦贺斯接手，虽然取得苏足盃冠军，但於苏超及欧霸盃屈居亚军。来到今季，格流唔单止喺联赛落後榜首些路迪9分，重返欧联分组赛更6战全败，包尾出局之余，仅入两球但狂失22粒，非常肉酸，令云邦贺斯冇得留低。

米高比尔得球员欢心

格流趁住世盃休战期间易帅，邀得昆士柏流浪教头米高比尔执教。查实粉丝对米高比尔并唔陌生，前季谢拉特带领格流打破些路迪垄断重夺苏超冠军，米高比尔就系佢助手，其後佢跟埋「谢老四」过档维拉，今夏则决定单飞，执教英冠嘅昆士柏流浪，亦稳站中游证明自己，而且佢深受依家格流球员爱戴，日前同利华古逊「拍跳」亦大胜3比0，睇嚟佢今次回家有助稳定军心。

另一边厢，喜伯年位处中下游，在世盃休战前7仗联赛，仅得1胜6负，若果单计作客，更系4连败，其中3仗半场已落後，见到都唔开胃，就算休战期间嘅热身赛，亦只得1胜1负，所赢嘅只系苏冠球队拉夫流浪，状态认真麻麻，随时半场都顶唔住有「新帅效应」嘅格流。文章摘自华体网