今晚世盃16强爆发瞩目大战，巴西同南韩争8强席位。两军睇落实力有距离，但唔好忘记「太极虎」一向以体力雄浑及斗志顽强见称，有力抵挡「森巴兵团」来犯。加上巴西今届踢法稳阵至上，分组赛3战总入球全开2球或以下，主Ｗ冇肉食，不如博中位数2.5球嘅入球细。（Now 618及616周二凌晨3时直播）


巴西提早获得出线权下，上仗分组赛出副选，踢到补时被喀麦隆绝杀输0比1，主力叉足电迎接今仗，睇落确实有利，不过唔代表佢哋可以轻易赢到南韩，皆因巴西喺主帅迪迪执教下，一反传统踢稳阵足球，今届头两场分组赛强阵出击，都只系赢塞尔维亚2比0及小胜瑞士1比0，更重要系呢两场令到对手冇中目标埋门，可见巴西防守非常坚固，等闲之辈都几难攻陷佢哋。

不过「森巴兵团」注重防守嘅同时，难免顾此失彼，令到攻力下滑，特别之前缺少尼马下，锋线顿失重心，虽然佢已伤愈并参与操练，但就算赶及复出，状态亦未必十足，加上加比尔捷西斯及阿历士迪尼斯因伤退队，人脚进一步受削。事实上嚟到淘汰赛，即使强队都唔会太冒进，以免被对手偷袭得手，就算巴西赢波，随时又系「煲鱼生粥」仅仅熟。

「太极虎」逃出生天士气大振

南韩上仗绝地反胜葡萄牙，戏剧性跻身16强，虽然话该役葡萄牙半力出击，赛果有些少「水分」，但「太极虎」踢出一场争气波，军心肯定大振，球员落到场自然会去尽每人跑多一步。同埋南韩分组赛曾经同另一支南美洲传统劲旅乌拉圭踢成0比0，获得宝贵经验，有力同巴西周旋，未必会大败而回。sportscn.com