欧联H组榜首大战，法甲班霸巴黎圣日耳门（PSG）主场斗宾菲加。两队同得7分排头两位，比第3位嘅祖云达斯多4分，今场赢波一方出线机会极高，但亦因如此，双方反而会变得谨慎，特别系宾菲加作客肯定主守，佢哋近7仗5次开半场和，再追无妨。（Now 646周三凌晨3时直播）
临近世盃 MNM锡身难免
PSG三叉戟基利安麦巴比、尼马同美斯入波易过食生菜，但佢哋早前传出不和，加上赛程频密兼临近世盃，踢得较锡身亦无可厚非，「MNM」近期入波数字明显下降。PSG上仗法甲收起美斯，尼马下半场先落场，仅靠麦巴比一人撑住，结果只能同兰斯踢成0比0。
宾菲加上轮主场同PSG各一平手，表现唔失礼，美斯嘅入波畀丹尼路彭利拿摆老乌抵销，今晚作客巴黎，宾菲加梗系想照办煮碗，希望喺呢场出线关键战抢到分，佢哋上轮已经同「MNM」交过手，会谂定办法阻止3人，加上球队近期旺开半场和，半场和有计。
