《屍殺列車》破盡香港嘅南韓、甚至亞洲片票房紀錄，坦白講，呢套電影特技唔係好出色，甚至有啲位小弟覺得係抄襲港產經典《殭屍先生》，不過可以從喪屍電影帶出深厚人情味同人性陰暗面，甚至對韓戰同世越號沉船慘劇等事件作出反諷，真係睇到南韓電影嘅進步。其實韓戰係唔少南韓人嘅包袱，唔少電影都以呢件事做題材，最近小弟就喺盒子睇到《仁川登陸戰》，講1950年南韓特務組織協助美軍進行間諜任務，間接促成仁川登陸戰嘅成功，亦係韓戰中南韓由絕境到反撲嘅轉捩點，鍾意間諜片或戰爭片嘅波友，都值得一睇。
南北韓關係緊張，實際上仲處於交戰狀態，南韓為咗保護國土，都差唔多實行全男皆兵嘅政策，由20至30歲男性都要接受兩年或以上強制兵役。由於呢段都係運動員、甚至演藝界嘅黃金時間，唔少國內聲音都希望政府作出一定放寬。好似足球員方面，如果拎到奧運獎牌或亞運金牌都可以免兵役，到06年更放寬世界盃打入16強都可以免役。南韓喺里約奧運八強被洪都拉斯淘汰，孫興民等主力喊到豬頭咁，唔多唔少因為奧運獎牌夢碎，又要面對番兵役問題。
24歲嘅孫興民就真係慘，喺熱刺守咗一年，今季終於搶番個正選，開季已經累積四個入球，而周日英超榜首大戰2:0擊敗曼城，孫興民雖然交白卷，不過交個助攻畀迪利阿里單刀建功，一樣靚到絕。孫興民仲有六年時間博一博唔使服役住，兩年後世界盃都算係較接近目標，當然啦，要打入決賽周就要12強賽出線，以佢嘅旺勢，相信南韓出線都不成問題。