今晚喺南韩举行嘅焦点热身赛，由热刺硬撼西维尔。两军啱啱开操未弗，而且热刺较多新兵磨合需时，何况西维尔近年对亲英超球队，总系踢得小心翼翼，在炎热天气下更加恶踢，唔慌多波入。
（周六晚7时开赛）
今仗系热刺今夏第二场热身赛，虽然日前对住实力次一级嘅韩职明星队大胜6比3，不过两度被对手追平，要靠后备入替嘅王牌哈利卡尼同孙兴民各入两球先赢波，仲要呢班明星队只系玩票性质，热刺咁样都失咗3粒，难怪主帅干地赛后坦言，入到6粒系好，但失3球点都唔满意。事实上，干地来到南韩已展开嘅「地狱式」特训，哈利卡尼同出名体能劲嘅孙兴民都操到呕，可见佢哋状态仍有待提升。
两军新兵多磨合需时
除此之外，干地今夏一口气签入比列锡及李察利臣等，必定想趁「拍跳」考察呢班新兵兼试阵，但毕竟大家复操冇耐，新旧球员默契不足下或影响发挥，翼锋古路施夫斯基又有伤在身，今仗未必出得。
另一边厢，西维尔亦有多名球员离队，包括迪亚高卡路士及奥古斯天臣，二人齐齐转投阿士东维拉，借将安东尼马迪尔亦回归曼联，而且今仗先系佢哋首仗热身赛，状态未起。加上西维尔近4次面对英超球队，有3次开2球或以下，喺南韩炎热天气下比赛更为吃力，预计今仗都系少交收。
