上星期講完德甲，呢個星期就輪到英超；講英超，無可避免要講曼聯。呢隊波撐嘅人多，反嘅人亦唔少，總之就多人關心啦。買完中場之後，大家都期待曼聯會買前鋒，上星期仲有記者當面問雲高爾，結果雲高爾神神秘秘，透露話唔定有驚喜，但小弟覺得簽前鋒嘅機會唔大。
由上季踢4-1-4-1到最近熱身賽踢4-4-1-1，曼聯呢兩個陣都有個共通點，就係踢單箭頭，而踢到最前嗰位仁兄就係拎住30萬鎊英超頂薪嘅隊長朗尼（右）。上季雲高爾一上任都講明，朗尼有特權、實有正選。假設有個勁過朗尼嘅前鋒，試問佢願唔願意嚟到曼聯做朗尼嘅後備？梗係唔肯啦！如果簽個弱過朗尼嘅前鋒返嚟，倒不如用查維亞靴南迪斯做替補啦。可能你會話我，改踢雙箭頭咪容納到朗尼同另一位頂級前鋒囉，但問題係曼聯已經有一大堆中場，又「小豬」又迪比，如果踢少個中場的話，又會浪費咗班頂級中場，唔通買迪比返嚟坐冷板咩！
如果朗尼一定要踢正選，中鋒係最好嘅選擇，可以發揮佢唔錯嘅射術。小弟上季見佢踢過中場，防守得個跑字，冇位置感，組織就淨係識分邊，仲要淨係識分去畀右邊嘅路爾斯華倫西亞。同安達靴里拉、卡域克一比，朗尼認真唔係中場嘅材料，返上前線先係最好。
再講阿仙奴，雖然雲格話暫時唔會再有大動作，但睇番佢近兩季嘅作風，佢係等緊皇馬買星之後賣舊人，買入性價比高嘅球員，好似買奧斯爾咁樣。