呢排歐洲主要聯賽未開「咧」，就兼顧多啲NBA，寫吓自由身球員轉會同續約，喺即將實施嘅巨額電視轉播合約，水漲船高效應下，好似有手有腳落到場打廿幾分鐘，就有張過千萬美金年薪嘅合約，以前塞爾特人、熱火搞三巨頭，球迷睇到嘩嘩聲，遲啲組軍可以四巨頭、五巨頭都唔出奇。
英超新轉播合約下季生效，據報冠軍球隊一季可獲過億鎊收益，中下游球隊都有8、9,000千萬鎊，仲未計門票、贊助等收入，可以預期英超球員亦都步向超高薪年代，隨時有手有腳都袋10萬鎊周薪。愛隊阿仙奴嘅領隊雲格（圖），一向被笑為守財奴，不過都肯畀10幾萬鎊周薪，簽入一個33歲門將，如果唔係世界變，就係身為經濟學專家嘅雲格，都認為佢以往嘅理財概念都要改變。
同戰友守丹都傾過，阿仙奴收購施治，都只不過係好過冇嘅收購。本身奧斯賓拿同施捷斯尼唔算得上世界最頂級門將，但都叫做國腳級同當打，相反阿仙奴增兵最逼切嘅位置，仍然係中鋒同防中兩個位。
基奧特唔係唔好，但好易傷，祖爾甘保又不受重用，普多斯基走埋，阿仙奴始終要個強壯中鋒，等「山神」、「禾仔」踢得冇咁辛苦。高基連上季冒起，但防中位都唔夠充裕，阿迪達狀態下滑，法米尼走埋，搵艾朗藍斯同辛迪卡索拉客串，都唔係長久之計，收購舒尼達連爭輸畀曼聯，雲格係時候加把勁。以呢個銀紙貶值嘅年代，雲格真係唔好再好似以前咁慢慢傾，出手要快、狠、準。