利物浦始終唔安心，用咗英超史上喺中鋒呢個位置上第三貴嘅轉會費，簽埋比利時空中霸王賓迪基加盟。領隊羅渣士上任三年，剛好喺轉會市場為紅軍使咗超過三億英鎊，獎盃未見，但陣容變動太大，要喺季初先聲奪人，困難重重。
連一個只係踢過幾十分鐘英超嘅富咸土炮小將「羅拔仔」，都可以最高收到800萬鎊投曼城，藍月亮恨土炮發晒茅。利物浦喺呢方面冇咁癲，今季撬番嚟嘅英兵尼達利基尼、丹尼艾格斯、占士米拿同約瑟高美斯，夾埋用咗2,000萬鎊，實而不華，應該好過上季簽嗰班歐洲水貨。
羅帥可能睇到紅軍新簽嘅「巴西新希望」羅拔圖法明奴，喺之前美洲國家盃八強對巴拉圭，代停賽尼馬踢中鋒嗰場，表現失望到簽咗都有啲驚。另一箭頭史杜列治臀傷搞咗好耐、回收嘅比利時人奧歷治剛見喺熱身賽，唔多上力；所以唔等幾時甩到「巴神」同波連尼，快手用3,250萬鎊擸埋成隊維拉最勁嗰個賓迪基。
據網站BBC資料顯示，英超史上買入嘅最貴10宗交易，利記係常客，全部係箭頭交收。翼鋒迪馬利亞去夏入魔居首，「費托」5,000萬鎊由利記去車仔排第二、安祖卡路爾3,500萬鎊由紐卡素去利記，排到第六；賓迪基呢單「刁」，都入到10大。
英超大部份球隊都棄踢4-4-2陣式，兩翼高波傳中強隊唔吼，羅帥當年踢走杜格利殊簽入嘅「高佬」安祖卡路爾，致力演繹歐陸式嘅地面進攻足球；如今踢開右翼嘅占士米拿又試緊移中校炮，咁又要睇吓，仲有十多日就開鑼，會唔會練多套鬥弱隊時，菲臘比古天奴同拉爾拉拿側擊，出波畀前鋒賓迪基衝門。
呢位比利時「大隻佬」雖然腳踭受重創長唞過一排，來英三季入球算穩定，必達雙位數；只嫌入波多數係恰到弱隊，上季聯賽入13球，鬥前四名球隊，只有對曼聯首次循環都有士哥。但呢三季對利物浦，都有士哥（上季足總盃四強），未知呢個係咪羅帥除一大患嘅方法；仲記得阿仙奴喺季尾足總盃決賽，全面截斷維拉中場對賓迪基嘅補給，後者全場得個撲字，錄得零射門。
利記揭幕日首戰會作客、上季尾被對手炒六個一皮嘅史篤城，有多個兇神惡煞、當打嘅賓迪基押陣，起碼定到驚啩！