史達寧炒到接近5,000萬鎊投曼城，球迷譁然，踩多過讚；但呢宗交易背後隱藏嘅含意，可能係壞了「紅魔」王朝復辟大業。
仲有三星期多聯賽就開鑼，英超列強組軍輪廓已現，曼聯同阿仙奴尚欠一箭頭、曼城會繼續搶簽土炮中場，利記同車仔叫做成軍；英國名牌國腳，剩番最值錢嗰兩位、哈利卡尼同韋舒亞仲有機會轉飯鑊，若果成事會比史達寧「染藍」更轟動。各隊都開晒操，相信買賣交易會稍為放慢腳步。
轉會市場無乜情義可言，好少好似車仔老闆阿巴咁，念舊將功高，逆摩佬意思，讓忠臣施治投敵隊阿仙奴；然後轉頭畀摩佬用成900萬鎊，喺史篤城買比高域返嚟，做泰拔高爾圖斯嘅副車。係咪戇「車」，車迷自度，但睇得出，摩帥個心一直係想做好防守；前線人選，借個「霉」咗好耐嘅法卡奧，就咁算數？
曼聯未買齊，上季一買一賣，淨支出逾億，雲高爾亦達會方最低要求，攞到歐聯外圍賽一席位。今季，佢同「大管家」活華特如狼如虎，睇怕要有盃先交到差。好一個霸氣雲帥，曼聯準備喺國冠盃前嘅記招，喺美國大數跟操幾個月、佢老人家算過晒先肯簽嘅門將域陀華迪斯唔聽話，又話一早已決定放棄同胞尹佩斯。
向已死嘅人「鞭屍」，亳無意義，但從該記招理解，雲高爾已有放棄「天使」迪馬利亞之心，換巴黎聖日耳門嘅正箭頭卡雲尼；一則可以減輕自己去季高價入水貨嘅痛楚，而且卡雲尼上季聯賽入18球得1助攻，仲少過老退中嘅伊巴謙莫域的19球入球同5次助攻，雖然質素非頂級，但法國人願交易。另外，就係曼聯錯過咗，簽入上季大爆發嘅熱刺箭頭哈利卡尼嘅黃金機會。
邊個肯出3,250萬鎊，阿士東維拉即放賓迪基，但總覺得曼聯唔啱使；雲高爾正尋找朗尼嘅拍檔，甚至未來接班人。如果心意早決，必早向活華特力薦上季尾、大約值5,000萬鎊嘅英超二號射手哈利卡尼。不過史達寧拉鋸到呢個價，利記先放畀叠水嘅曼城；而數據更突出，高大又耐戰嘅「三獅新希望」卡尼，唔會係熱刺貪財班主利維唔願放，而係曼聯兩大入貨主腦，敢唔敢甘願再冒「天使」之險，天價入貨？